هو الفيلم بيدور حول بطل بيكتشف بالصدفه اصابته بمرض اللوكيميا " سرطان في الدم " فيقرر انه يبعد عن اسرته "زوجته وابنه ووالده" لانه تصور انه وجوده معاهم ايتسبب في تعاستهم...والمه هو كمان لانه شعوره انهم بيتالموا عشانه ايوجعه اكتر من المرض نفسه ..هو فضل انه يعمل زي الافيال لما تحس باقتراب ساعة موتها بتقرر انها تبعد عن القطيع عشان تموت لوحدها ..
هو كان في اقصي درجات اليأس ورفض أي محاوله انه يكمل علاجه لان الياس اللي جواه كان بيخنق أي نقطة نور ممكن تقدر تديله بعض الامل ..
.. البطلة عندها نفس المرض .. لكن الامر اختلف بالنسبه ليها لان عندها هدف تريد تحقيقه انها تكون راقصة باليه مشهوره .. فنقطة النور جواها مقدرش الياس يخنقها , لكنها في نفس الوقت خافته ضعيفه صعب انها تكون دليلها بدون مساعدة حد في طريق مظلم يمتلئ بكثير من الألم ..
يمكن حالتهم الصحيه المتشابهه جمعت بينهم قربت بين قلوبهم .. اتشاركوا مع بعض احساس الالم والوجع لكن في نفس الوقت اتزرعت نبتة الحب جواهم , والحب ده كان اشبه بطاقة النور اللي ساعدتهم يلاقوا طريقهم والخروج من النفق المظلم اللي كانوا مسجونين جواه ...
انا في البوست ده مش بحاول احكي احداث الفيلم اللي اكيد اغلبكم اتفرج عليه , لكن بحاولة قراءة بعض المعاني اللي فيه ..
الحب فعلا قادر يحقق المعجزات وممكن يداوي جروح كتير جوانا ويخفف كتير من اوجاعنا....... ياتري ممكن عشان نحقق السعاده لينا نجرح قلوب تانيه ملهاش ذنب ....... مفروض نضحي عشان اللي بنحبه حتي لو كانت التضحيه دي اننا نبعد عنه .....الامل نقطة نور جوانا بس دايما بنحتاج الايد اللي تلمس قلوبنا وتخلي نقطة النور دي طاقة من الامل تنور طريقنا
في الفيلم اغنيه جميله اوي بحس انها بتلمس جوايا اوي .. مركب ورق في البحر...
والبحر قلبه كبير كبير
مركب ورق قلبى
بتعاند المجادير
موج ياخدها لفوق
وموج يطوحها
شطوط بتحضنها
وشطوط بتجرحها
والبحر بجلاله ... كتير مبيسعاهش
مركب ورق قلبى
أوان فرحها مجاش
Hi5 Falling Stars
هناك 30 تعليقًا:
اولا خلينى اقولك الله ينورعليك يامحمد
اختياراتك جميلة حتى فى الافلام :)
الفيلم ده بالذات بقول انه بيقدر يعمل جوايا حاجات كتير مش عارفاها ومفش مره اسمعه الا واقعد بمناديل :((
عارف دايما بسأل نفسى نفس الاسئله اللى انت سألتها فى البوست دى وفى معظم الوقت مش بعرف اجاوب على حكاية خان مراته ولا لأ؟
لكن دايما كانت بتصعب عليا منه شلبى وبقول انها اتظلمت فى القدر ده وداما بقول انى لو مكانها مش عارفه هقدر اضحى زيها كده ولا لأ؟
بس اللى اعرفه انه هو غلط لما تعب وبعد لانه من باب اولى اذا كان هيموت يبقى يمون فى حضن مراته وابنه احسن مايموت بعيد عنهم
لانهم فى كل الحالات هيتعذبوا ببعده
وبخصوص موقف حبيبته اللى بعدت عنه بعد ظهور مراته برضه مش عارفه ده صح ولا غلط؟
حاسه انى استعدت نفس الالم اللى بحس بيه لما بسمع الفيلم
تسلم ويسلم ذوقك واسفه للتطويل :)
الفيلم حلو فعلا
و السطرين اللى اتشالو من البوست حلوين اوي كمان
ظهروا عندي فى الريدر
عادي ان بعض الافلام احداثها بتلمس شيء ما بداخل كل منا
اما ان الواحد بيمر باي ظرف من ظروف الفيلم سواء اكان له او لأحد قريب منه
دايما إحساسك هايل بكل حاجة حتى الأفلام
دعواتك بقى عشان الإمتحنات
دمت بكل الود
فى حفظ الله
الموضوع كبييييييير يا محمد
اولا انا بضم صوتي لصوتك فعلا الحب بيعمل المعجزات و بيخلي روحك مرتفعة و واصلة للسما و الدنيا لونها بمبي و نفسك مفتوحة لكل حاجة في الدنيا و اعكس كلامي بقي لو اتشال الحب
بس السؤال هنا هل الحب لا يحكمه العقل الاجابة بقي علي السؤال ده هي لا
الحب بيحكمه العقل ممكن قصة تخدك و تعيش فيها و تحصل حاجة اي سبب تنتهي في اللحظة دي عقلك بيشتغل و يقولك استوب انت هاتستعبط ماتعيش فيها و تعمل نفسك الشهيد و شوية بشوية بتنسي و هاتقدر تنسي رغم انك بتحب الشخص ده جدا
او ان مثلا تعيش قصة حب زي اللي في الفيلم واحد ساب مراته و ابنه اه كما هو تصور بدافع حب طيب لو كان حب بجد كان لية دور علي حب تاني او سمح للحب ده انه يملكه لكن هنا البطل ماقدرش يحكم عقله و استسلم لقلبه عكس البطلة اللي حكمت عقلها و فرملت قلبها و اهي عاشت زي القردةو الخايب التاني مات هههههههههههههههههه
كنت لسة بتفرج علي فيلم لنجلاء فتحي و الباشهندز حسين فهي ( جنون الحب )و كانت احداثه ان جوزها احمد مظهر مشغول عنها في الشغل و سي حسين بقي بتاع بنات شفها فعجبته و اشتغل عليها لحد ما حبو بعض طيب يعني هي الدنيا زنقت معاه مش لاقي غير المتجوزة و لا التانية ماانتي عارفة انه رجل اعمال و مشغول وافقتي تتجوزيه لية من الاول
اهو تقول اية كانت في لحظة هاتستسلمله و يسلبها اعز ما تملك طيب فين عقلك هنا يا قطة
الناس بمزاجها يا محمد بتسيب نفسها للحب و لو عايزة تحكم عقلها بتحكمه بس احنا اللي بنستعبط
اه الحب ساعات بياخدك و قلبك بيخون عقلك كتير بس انت تقدر تحكم عقلك لو عايز و تفرمل اللي عايز يتفرمل
و السلام ختام
بجد الفيلم ده مؤلم جدا
وحقيقى الحب ده مش اختيارنا ياريته كان اختيارنا
لكن للاسف مش اتيارنا لكن اهالينا ومجتمعنا مش فاهم كده وفعلا دايما المصائب بتقرب النس ببعض
حران نقسوا على مشاعرنا قوي كده ليه دايما خانقينها ايوه كان يعمل كده علشان مراته وابنه لكن هو مااخترش والبنت الباليرنا برده مااخترتش احنا بنصعب دايما الامور على بعض رغن ان كل حياتنا اقدار ومش اختيار
سيدي يا سيدي
ايه الجمال ده كله
وايه الرقه دي كمان انا كمان بحب الفيلم ده وبحب الاغنيه دي جدا وديمن لما بشوفه بعيط كتير لانه بجد كله احساس
اولا
اذيك يا محمد
فاكرنى ... ولا ؟
المهم ان الفيلم ده من احسن افلام هانى سلامه فعلا
تحيات بهيه
متيألى كده افتكرتنى
الحب فعلا قادر يحقق المعجزات وممكن يداوي كتير
لكن هو خان مراته وخان نفسه كمان لان مش من حقه يقرر عنهم ان بعده افضل
ولم يعطهم فرصة انهم يدعموه او يقفوا بجواره
وفعلا اثبت بعد كدة انه مكنش عنده امل او هدف بعكسها
واستسلم
تحياتي
اختيار جميل
ونظرة للفيلم جميلة من خلال المعاني اللي فيه
نفس السؤال سألته
ليه حبه لمراته وابنه مش كان هو شعاع الأمل حتي لو مش كان عايز يسبب لهم اي جرح لكن صدمته يمكن خلته مش قدر يفكر او شخصيته خليته يهرب من المواجهه ويفضل انه يبعد لوحده او يمكن هو كان محتاج لحد يزرع جواه امل جديد ويكون حاسس بيه اوي
بحب غنية مركب ورق في البحر اوي
والفيلم كله يعتبر من اجمل الافلام اللي عملها خالد يوسف لانه كان فيه مشاعر انسانية كتير جميلة
كان لازم يبعد علشان نظرة الحب ماتتحولش لشفقه
علشان نظرة الأمل اللي جوا عيون إبنه مايشوفهاش وهي بتتحول لنظره يتيمه
لازم يبعد علشان العمر اللي فاضل في عمر أبوه ماتنتهيش أسرع وهو بيشوف ابنه بيموت ادام عنيه
قلبه دق لإنسانه حست بيه وهي كمان مريضه
قلب عاش وهو بيموت
كان لازم ينبض بالحياة ومعنى الحب من بعد ما مات في عمر الزهور
حب الحقيقه والحياة أقصر بكتير من حب القلب الل حسه وهو في حضن الموت
**
لما بشوفه مش بس بحزن ولا بتملاني أحاسيس شجن
ومهما كتبت مش هاوصف بحس ايه
كفايه إنه مهما كان الوقت قصير
إنه يكون معاها حس بكل العمـر
انا كمان بحب الفيلم ده اوى اوى
مشاعره جميله حانيه جدا
و الحب قدر و نصيب زى الموت و الفراق
تحياتى
كلعادة موضوع جميل انا اكتر جزء بحبة وهما ع النيل وبتقولوة حلمي اني امشي واجري مع شاب امور ونجري والدنيا تمطر
بالنسبة للفيلم باتفق معاك في انه بيحمل كمية شجن كبيرة .. ويمكن اهم عنصر في الفيلم هو المعني اللي قدمه
انا شايف ان البطل ماحاولش يهرب لكن جايز كان بيشوف ان حب مراته ليه ممكن يكون مختلط بنوع من الشفقة والتعاطف مع مرضه وده ممكن يكون احساس بيعذبه .. لكن ربما يكون الحب اللي صادفه بعدين شعر انه حب بدون اي دوافع لانها كانت مريضه زيه وعمرها ماهتحاول تظهر حبها ليه بدافع تشجيعه او زرع الامل جواه فقط و حس لأول مرة ان حد بيحبه لشخصه وحاسس بكل اللي جواه
أحيانا الانسان المريض بتكون عنده حساسية مفرطة في تعامله مع اللي حواليه وبيفسر اشياء كتير بغير معناها
انا مش بادافع عن وجهة نظره وباقول انها صح او غلط بس باحاول اوصل لتفسير
موضوع مميز و انا باحب المواضيع اللي تخلق حالة من الجدل والنقاش
تحياتي
habiba
انا بحب اوي اشوفه رغم اني تقريبا بقيت حفظه لان المعاني الانسانيه اللي جواه بتشدني اوي ..
انا يمكن كنت متعاطف مع البطل والبطله لاني حاسس ان الانسان في حالة ياسه بيتخبط وممكن يجرح نفسه او يجرح ناس قربين منه من غير ما يقصد ..
هي الزوجه ممكن تكون اتظلمت واتهانت في مشاعرها من غير ذنب , بس برده مفروض تقدر انه لما بعد مكنش عشان واحده تانيه وان الحب اتولد بالصدفه وهو مكنش بيدور عليه
نورتيني بجد يا حبيبه ومتشكر لمداخلتك الجميله دي
واحدة مفروسة
انا يمكن شلتهم لان محبتش البوست يتناقش كانه مساله شخصيه لكن كمعاني مطروحه للمناقشه وكل واحد ليه حق انه يقول رايه سواء كان متعاطف مع البطل او البطله او الزوجه
حضرتك نورتيني وانا نقلت ردك في البوست اللي فوق لانك رديتي في البوست اللي كان مفروض اشيله عشان ميكنش البوست مكرر لاني نسيت احوله مسوده
mohamed ghalia
ربنا يخليك يا محمد , وان شاء الله ربنا يعينك ويوفقك في الامتحانات
نورتني يا باشا
شهد الكلمات
فعلا عندك حق يا شهد الحب محتاج للعقل في بعض الاوقات عشان يفرمل مشاعرنا , لان ممكن الحب ومشاعرنا لو اتسابت بدون كنترول تودينا في داهيه ..
لكن في نفس الوقت منخليش العقل وحده يتخذ قراراتنا عشان منعش في تعاسه طول حياتنا , يبقي لازم موازنه بين الاتنين علي اد ما نقدر
زي ما قلت في البوست هو ليه دور عن الحب بعيد عن مراته وليه كان حب جديد هو الدوا .. بس زي ما قلت برده يا شهد هو مكنش بيدور عن الحب وهو كان في حالة ياس والحب اتولد مع الامل بمحض الصدفه
نورتيني بجد يا شهد
هاتفق معاك يا محمد ان الفيلم دا فيه كمية كبيرة من الشجن والمشاعر الجميلة
الفيلم بيخلينا نسال أسئلة انت طرحتها فى البوست ويمكن اكثر كمان
بيخليك مش عارف تتعاطف مع البطل ولا مع البطلة حتى من جواك انت عارف انه خان زوجته بس مع ذلك بتتعاطف معها ومع نيلى كريم
عارف والله بحس بوجع قلبى منة شلبى اوى فى لحظة لما تحس ان جوزها حبيها بيحاول يبعد عنها جايز هو بيبعد لانه مش عاوزهم يتالموا معاه بس مهما كان الوضع على الزوجه صعب وكمان موقف نيلى اللى حبت انسان بدون اى مصلحة فقط لمجرد الحب بعيدا عن مبادىء وقوانين الحياة
يااااااااه يا محمد مهما قولت واتكلمت عن الفيلم دا مش هاقدر اخرج كل اللى جوايا
تسلم ايدك و يسلم احساسك
تحياتى
يويو
GiGi
فعلا زي ما قلتي يا جيجي الحب عمره ما كان اختيار , هو كان في حالة ياس والحب هنا كان اشبه بنقطة نور في نفق مظلم , يا تري هو اخطأ لما فكر انه يسترشد بيها لمحاربة جيوش الياس والمرض اللي كانت بتحاصره ؟؟؟
نورتيني بجد يا جيجي
فتاه حالمه
ربنا يخليكي , وانا سعيد ان البوست عجبك وفعلا من اكتر الافلام اللي مليانه احساس
نورتيني بجد
غني يابهيه
طبعا يا مصطفي انساكي ازاي يا راجل , بس انت اللي بقالك فتره مختفي
نورتني بجد يا باشا
kochia
مش عارف حاسس في ردك ببعض القسوه يا كوتشيا , احنا كلنا بشر مفيش فينا ملايكه هو يمكن غلط لما بعد عن مراته وابنه لكن هو كان في حالة ياس ومكنش بيدور علي حب تاني ولاحاجه , لكن الحب اتولد بالصدفه .. انا شايف لو كان الحب ده مجرد مشاعر نبيله فاكيد ممكن نلتمسله بعض العذر مادام الامر متطورش للخيانه بالمعني الشامل للكلمه
نورتيني بجد يا كوتشيا
سنووايت
يمكن زي ما قلتي سنووايت هو كان محتاج حد يحس بيه اوي وامل جديد جواه
ساعات بيكون عندنا ناس قريبين جدا مننا لكنهم بيبقوا عاجزين انهم يوصلوا جوانا اوي عشان يحسوا بوجع ممكن يكون بينزف داخل روحنا
نورتي بجد يا سنووايت
مدينـة من النسـاء
ممكن لحظة تعادل عمر .. ممكن رجفه حب واشتياق تبعث الحياه في حاجات كتير ماتت جوانا .. الامل ساعات بيبقي زي الشمعه بتبقي محتاجه هوا متجدد باستمرار عشان متتخنقش .. زي ما قلتي مفيش اصعب من حب يتحول شفقه .. مراته حتي لو كانت بتحبه فنظرة اللهفه والحب في عنيها اتمتزج بشفقه .. لكن الحبيبه هنا حبته بجد من غير ما تستني حاجه منه , هي كانت زيه محتاجه الحب ده اللي يكون بعيد كل البعض عن نظرة الشفقه اللي ممكن تموتنا الف مره
نورتيني بجد يا مملكه
Rania
فعلا يا رانيا الحب زي الموت والفراق قدر مش بايدينا وملناش فيه اختيار
نورتيني بجد يا رانيا
حروف (دلو مرة ثانية وجرح ثاني سابقا
انا برده بحب المشهد ده اوي , بصراحة مشهد المطر في اي فيلم بيولد جوايا مشاعر واحاسيس غير عاديه
نورتيني بجد يا حروف
فارس بلا جواد
فعلا انا متفق معاك جدا يا فارس في تفسيرك .. فعلا الانسان في لحظات ضعفه زي المرض مثلا بيبقي عنده حساسيه مفرطه وممكن نظره شفقه تقتله او اي تصرف من اللي حواليه يثير جواه طوفان من المشاعر المتناقضه .. وزي ما قلت هي مكنتش محتاجه منه حاجه ومكنش في اي سبب يخليها تبادله المشاعر ده لو مكنتش حساها اوي بجد
نورتني بجد يا فارس
yoyo
فعلا يا يويو الفيلم بيولد جوانا كم هائل من المشاعر والاحاسيس المتناقضه وعدد كبير من الاسئله الحائره .. لكن ايا كان رايك فبتجدي نفسك متعاطفه مع كل البطل والبطله وكمان الزوجه , كلهم انجرحوا ويمكن ظلموا او اتظلموا دون اختيار منهم
بجد نورتيني يا يويو وان سعيد البوست عجبك
cool blog
I will pass on your article introduced to my other friends, because really good!
إرسال تعليق