|
|
عيدٌ بأيّةِ حالٍ عُدتَ يا عيدُ بمَا مَضَى أمْ بأمْرٍ فيكَ تجْديدُ ده بيت للمتنبي ويمكن كتير مننا بيجي علي باله مع قدوم العيد ..
مش عارف ليه دايما مع العيد بنلاقي نفسنا بنفكر في حياتنا كلها وكأننا بنفتح كشف حساب للي عملناه السنه كلها , فيا تري العيد السنه دي يشبه العيد السابق ولا فينا اللي العيد السنه دي حمل تجديد ليه فعلا ؟؟؟
يعني مثلا حد حقق نجاح ما سواء علي مستوي الدراسه بتاعته او علي مستوي حياته العمليه وحس انه بدأ لاول مره يشق طريقه في الحياه ..او في منا اللي اتوجد في حياته قلب تاني ارتبط مع قلبه بمشاعر حب ومن خلال المشاعر دي حس لاول مره بطعم رائع ومختلف للحياه ..او اتعرف علي اصدقاء جدد حمل وجودهم في حياته تأثير خاص وقدر معاهم يتخلص من احساس وحده كان خنقه.. او فينا اللي جمع بينه وبين حبيبه صله رسميه ربما تكون خطوبه او زواج .. او حد فينا احتفل باول طفل ليه يتوجد للدنيا وحس لاول مره ان حياته بقت مهمه لناس تانيه .. او فينا اللي جرب طعم العطاء وانه يدخل علي ناس تانيه احساس بالسعاده حتي لو كانوا مش بيربطهم بيه اي صله
واكيد مش الاشياء الجميله بس اللي بنقيمها لكن اكيد برده بنقيم ونتذكر ذكرياتنا الحزينه والمؤلمه ...ففي منا اللي فارق حد عزيز اوي عليه وحس بعده ان الحياه فقدت أي طعم ليها ..وفي منا اللي اتخان او انجرح من صديق او حبيب وربما ده خلاه يفقد الثقه في كل الناس , او بص فجأه لنفسه وحس انه ماحققش أي حاجه وان السنين بتسرب من ايده , فكل اللي عرفهم حققوا اشياء في حياتهم لكن هو زي ما هو ..
علي أي حال ايا كانت الحصيله النهائيه للسنه اللي فاتت , فاحنا انحاول منفكرش عشان ما نضيعش احساس الفرحه بالعيد واول يوم اناكل اللحمه والفته ونسطل وننسي . ممكن بعضنا ايخرج و يزور اقارب ليه ووسط الضحكات والمرح المتصنع احيانا برده اينسي , اغلبنا ايحاول يستمتع بالعيد علي اد ما يقدر , لكن برده في منا اللي غاويين نكد اول ما يختلوا بنفسهم ايحسوا بدموع كتير ماليه قلوبهم ويكتشفوا ان قناع الابتسامه والسعاده المفتعله وقع لان ببساطه لسه ماخترعوش قناع سعاده للقلوب
طبعا اكيد حسيتوا اني انتمي للعالم النكديه امال يعني حد متفائل يكتب النكد ده كله علي العيد
طيب نختم البوست بحبة تفاؤل من ذكريات الطفوله .. انا طبعا كل ما يجي العيد تيجي علي بالي اغنية صفاء عبد السعود بتاعت العيد فرحه يا سلام ههههههههه وانا قلت اجبلكم وصله ليها يعني عشان تسترجعوا ذكرياتكم معاها
وكمان بيني وبينكم ان طول عمري بحب العيد الكبير اكتر من الصغير, ناس اتقول طبعا عشان الفته واللحمه اه طبعا اكدب يعني ههههههههه
لا اكيد مش ده السبب الوحيد , لكن لانه ايام المدرسه اوقات كتير كان بيجي في الصيف فطبعا بيبقي اجازه من غير مذاكره ونعرف نعيد علي راحتنا ..وكمان البيت عندنا بيبقي مليان بالضيوف خاصة من جيرانا من البيت القديم اللي رغم تركنا ليه فبتفضل الزيارات مستمره منهم لا تنقطع خاصة في العيد الكبير... وكمان في سبب يضحك انه انا كنت وانا صغير عاشق للافلام الهندي ووقتها القناه التانيه كانت متعوده كل يوم تجيب فيلم هندي في العيد الكبير بالذات وانا بقي ساعتها كنت ببقي مبسوط اوي ههههههههههه
اخيرا... مره تانيه كل سنه وانتم طيبين وحاولوا تلبسوا قناع السعاده اليومين دول بلاش نكد خاصة للناس اللي غاويه نكد زي حالاتي ..