يوتوبيا .. وثلاثين عام من الانجازات

يمكن بعضكم قرا رواية يوتوبيا للكاتب الرائع احمد خالد توفيق , وهي للي مقرهاش بتحكي في قالب فانتازيا عن مصر بس ادام شويه , يعني المستقبل المنيل كما تصوره الكاتب ...

ان مع ازدياد الهوه الطبقيه , اه عشان محدش يقلي ايه الكلام المكلكع ده اقله الهوه الطبقيه يعني الاغنيا يزدادوا غني والفقرا يتنيل بيهم الحال اكتر واكتر .. ايحصل ايه ؟؟؟

الكاتب تصور ان الناس الهاي كلاس اوي اللي عندهم تخمه من كتر الشبع , ايخافوا علي نفسهم من الرعاع اللي هما طبعا غالبية الشعب فعملوا يوتوبيا اللي هي عباره عن جيتو في الساحل الشمالي واستعانوا بحراس من المارينز المتقاعدين متسلحين بطائرات هليكوبتر مزوده بمدافع رشاشه لمواجهة اي عصيان او محاوله لاقتحام يوتوبيا , والكاتب بيصور بشاعة حال الفقرا او بمعني ادق اغلب الشعب , ممكن نتصوره ان الخرائب اللي بتضم اولاد الشواراع الان بقت بتشمل كل البلاد ماعدا طبعا يوتوبيا .....حتي هناك جزء بيتكلم ان المحظوظين منهم سيحظوا علي مصدر للحوم من خلال دجاجه ميته كاجر لهم نتيجة عملهم الشاق في احد مراكز تجميع الدواجن النافقه ..

معذره انا مش احكي احداث الروايه لان ده مش موضوع البوست

انا شايف ناس فتحت بقها واتقولي بعد الرغي ده كله جي تقولنا مش ده موضوع البوست .. ما هو الدش اللي قلته ليه علاقه مهمه بكلامي اللي اقوله دلوقتي

سبب كتابتي للبوست ده , عباره اتكررت كتير بسبب احداث غزه , انتم يعني عاوزين مصر تحارب وتضيع الانجازات اللي اتحققت في خلال تلاتين سنه !!

انا طبعا قعدت فتره متنح من العباره دي , مش لا سمح الله اني بكدبها , لكن لاني اكتشفت اني اني حمار مش فاهم حاجه , او يمكن نظري ضعف من قعدة الكمبيوتر مش شايف الانجازات اللي متنتوره هنا وهناك , فقلت يا واد فكر شويه وانت اكيد اتكتشفها بس ركز بس

يمكن مثلا قصدهم , من الناحية العسكريه .. اه عندنا من غير قر ولا حسد طيارات من كل الانواع " المسموح لينا بيها " معونه من ماما امريكا , وكمان نظام دفاع جوي مش بطال , يعني ممكن نقول جيش حديث مسلح تسليح جيد , طيب كويس اوي ...

بس ما هو العراق ايام صدام حسين كان مخزن ترسانه عسكريه تسد عين الشمس قعد يحوش فيها من ساعة ما مسك الحكم , اينعم هما الامريكان والغرب استحمروه وخلوه يدخل حرب 8 سنين مع ايران لكن الترسانه بتاعته كانت لسه بخيرها برضه .... لكن لما حب يخرج عن الخط اللي امريكا رسماه ليه اتعكت فوق دماغه , والترسانه العسكريه المهوله اللي كان الامريكان عمالين ينفخوا فيها ذهبت مع الريح , والعراق انتهي حالها كدوله محتله ......

طيب ليه يا جماعه حصل كل ده والفلوس اللي اتصرفت علي التسليح وبقت في جيوب امريكا والغرب منفعتش ليه ؟!

اجابة السؤال ببساطه .. ان امريكا لما بتديك السلاح بتمنحك قوه زائفه لانها عندها الاسلحه الاكثر تطورا اللي تدمر السلاح اللي ادتهولك لو ما سمعتش الكلام ..... معيار القوه العسكريه الحقيقي في زمانا ده هو امتلاح سلاح الردع النووي وامتلاك صواريخ ذات بعد استراتيجي يمكنها من ايصال السلاح لعمق العدو




واحد يقلي يعني احنا عندنا فلوس عشان نغطي التكلفه الضخمه لكي تصبح مصر دوله نوويه ولا هما ايسبونا .......

طيب يا جماعه ماهي باكستان مش اقول الهند علي اساس انها دوله اسلاميه ..شعبها مش لاقي ياكل وامتلكت بالفعل السلاح النووي وهي يعني معملتش اعلان في الجرايد انها بتعمل سلاح نووي , ولا اسرائيل الطفله المدلله لامريكا حد عرف انها بتعمل سلاح نووي الا لما اكتشف العرب متاخر زي عادتهم انها عندها ترسانه نوويه قادره ان توصل من خلالها عدة قنابل ذريه لكل عاصمه عربيه ولديها الصواريخ المتطوره التي يمكنها ان توصلها وتغطي جميع انحاء الوطن العربي ....طبعا بلاش اجيب سيرة معاهدة كامب ديفيد ,اللي بتخلي سيناء في واقع الامر تحت رحمة الاجتياح الاسرائيلي في اي وقت , لان مش مسموح لمصر تدخل اي جيش لسيناء او اي قوات مسلحة باسلحه ثقيله والا اعتبرت انتهكت الاتفاقيه

خلاص بلاش سيرة الانجازات العسكريه , احنا دوله بتاعت سلام .. ومفيش اجمل من حمامة السلام وغصن الزيتون .. والسلام عليكم علي راي حكيم ...

خلاص ندخل علي الانجازات الاقتصاديه .. طبعا محدش يقدر يتكلم .. ده بيقلك في دراسه ان مصر من اكثر العواصم في العالم امتلاء بالسيارات .. ومفيش مصري الا ومعاه محمول , حتي بيقلك الطفل المصري بينزل من بطن امه دلوقتي ماسك الموبيل وحارق كارت بعشرين جنيه علي الاقل ... ده غير عصر النت اللي بقينا فيه وحكومة عم نظيف الاكترونيه

اه بس في حاجات هايفه معكننه الواحد ....مثلا ان طابور العيش في مصر لم يدخل ضمن آليات الحكومه الاكترونيه فنظام الرغيف الاكتروني لم يطبق بعد ... كما ان الانسان المصري مازال مصرا ان يلقي بنفسه الي التهلكه دون ان يستفيد من انجازات الحكومه الاكترونيه.. يعني مثلا بالنسبه لوسائل النقل ايه لزمته السفر وتلاقي نفسك في قطار يولع فيك , ما تقضي مصالحك بالموبيل يا اخي ...ولا ايه يشحططك وتتذل في دول عربيه خليجيه وتكون نهايتك في عباره لان سيادتك مبتعرفش تعوم علي راي احمد ادم . طيب ما تخليك في بلدك والخير كتير انت بس هتلك خط موبيل بيزنس واقعد علي الرصيف وشوف الفلوس اللي اتمطر عليك ...

ولا تروح مسرح عمللي فيها مثقف وتلاقي نفسك لحم مشوي في عرض مسرحية الجحيم , ما تقعد في بيتك امال الحكومة صرفت دم قلبها علي القمرين بتوع النيل سات عشان مين !!

طبعا غير المشاريع العملاقه اللي خلت مصر من الديناصورات الافريقيه " علي منوال النمور الاسيويه ", زي توشكي مثلا ولو ان في مغرضين بيقلك مليارات اتصرفت ومشفناش منه حاجه .. طبعا هم حمير مش فاهمين ان الاجيال الجيه بعد كام قرن كده ايستفادوا منه !!!

ياللي بتكلموا عن الانجازات الاقتصاديه ... اليابان والمانيا بعد الحرب العالميه التانيه كانا مدمرين تماما لكنهم في اقل من التلاتين سنه بتوعنا دول بقوا قوي اقتصاديه عظمي .. بلاش دول ناخذ مثال علي ادنا .. ماليزيا دوله اسلاميه زينا .. قارنوا الاقتصاد بتاعها وقدرتها التصنيعيه بينا وانتم اتفهموا .. حقيقة الانجازات اللي اتعملت في تلاتين سنه

اللي بيحصل في مصر هو اتجاه البلاد انها تتحول زي يوتوبيا الكاتب احمد خالد توفيق .. ناس بتعاني من التخمة من كتر الاموال اللي سرقوها من البلد ودول اللي النظام خايف علي مصالحهم عشان كده بينتهج عقيدة الاستسلام وليس السلام ...... واغلب الشعب حالته في تدهور والمسكنات اللي الحكومه بتدهاله كل حالته ما تتنيل زياده مبقاش ليها اي تاثير ...

وفي الختام اقول والنبي يا حكومه كفاية انجازات اكتر من كده.. واعتبرينا شعب وغلط