تاجات

بداية احب اقول , اني لما دخلت عالم المدونات لفت نظري حكاية التاجات دي ," انا مش عارف هما اصلا سموها تاجات ليه" طبعا قعدت فتره مستني يعبرني ويبعتلي ولو تاج جبرخاطر مفيش مممممممم انا بقلت ولا يهمني اشوف حد من اللي بيعملوا التاجات يعملي واحد ولا ازعل نفسي .. لغاية اخيرا لما جالي تاج وبدأ توالي التاجات هييييييييييه .. الغريبه بقي يروادني شعور بالكسل وبقيت اركنها عندي ممممم

انا دلوقتي لما فتحت دولاب الكراكيب بتاعي لقيت تلات تاجين منهم تاج جالي من جهتين مختلفتين , فقلت يبقي عندي دم واجاوب عليهم بقي , نبتدي .....

التاج الاول , هو تاج الاحلام وجالي من شهد صاحبة مدونه " شهد الكلمات " ورانيا صاحبة مدونة " fellings"
احب اقول بداية التاج ده من اصعب التاجات اللي ممكن اجاوب عليها , لاني ساعات لما بسأل نفسي السؤال ده " بتحلم بايه" بعرفش اجاوب ؟!.. وعموما انا عدلت شويه في بعض الاسئله

اذكر أحلاما تخص ماضيك..و كنت ها تتخلى عن أية فيها و ها تتمسك بأية لحد دلوقت ؟؟؟؟

يمكن احلامي زمان كان فيها خيال كتير , كنت بتمني اعيش في عالم الاساطير , يعني كنت بحب وانا صغير مثلا اليس في بلاد العجائب وحلمت اني اكون زيها وادخل في عالمها الخارج عن قواعد المنطق .......ولاني كنت بحب البحر تمنيت اني اعيش فيه علي طول ,او امتلك قدرة السمك اني اتنفس واعيش في اعماقه ... حلمت وانا صغير اكون دكتور يمكن لاني جربت الالم والمرض كتير وده خلاني اقابل بعض النماذج لدكاتره حسيت انهم يحملوا قلوب ملايكه عشان كده تمنيت اكون زيهم واخفف وجع الاخرين خاصة الاطفال .....تمنيت يكون عندي مصباح علاء الدين واطلب فلوس كتير احل بيها كل مشاكل العالم لكني دلوقتي بقي تصوري ان الفلوس ممكن تحل بعض المشاكل لكنها مش ممكن تحقق السعاده والسلام في العالم ... حلمت اكون كاتب كبير ممممممم .. حلمت ان يكون عندي جناحين زي الطيور , واتغلب علي كل قوانين الجاذبيه وابقي لدي القدره اني اسافر بين المجرات ....حلمت حلم غريب اني امتلك آلة الزمان !!!!!

اذكر أحلام تخص مستقبلك ؟؟؟؟

طبعا لسه حلمي اكون كاتب كبير .. بحلم اني الاقي السعاده الحقيقيه واني اضحك بجد من قلبي ... بتمني اني مفتقدتش حد تاني من الدايره المقربه ليا لاني مش حمل وجع قلب والم تاني ...بحلم اني يجي وقت كلمة عربي او مسلم تثير لدي الشعوب الاخري مشاعر تفيض بالانبهار والاجلال ...بحلم الاقي قلب كبير محب اوي ومخلص اوي يقدر ينفذ الي اعماقي واحس ان روحه تعرفني واعرفها حتي قبل ما نتقابل .. اخر حلم مش اقوله لكن اعبر عنه بدعاء بدعيه كتير لربنا " اذا كانت الحياة خير لي فاحيني واذا كان الموت راحة وخير لي فامتني " ..

انا اعدل في باقي اسئلة التاج واخليه شخصيه في حياتك تتمني وجودها ؟؟؟؟؟؟؟؟؟؟

اكيد بتمني ان والدي كان لسه عايش , لانه كان من احب المخلوقات لقلبي , وبحس كتير اني اشبهله اوي في الروح ...
اخيرا في شخصيات اتوجدت في حياتي واثرت سواء بالايجاب او بالسلب . اقلهم شكرا جدا باختلاف المعني .......



التاج التاني اسمه الصراحه من توتا صاحبة مدونة يوميات فتاة محتاره

لو اعطيتك 3 وردات من هم ال3 اشخاص الي هتديهم الورده؟

ممممممممممم واحده لاسرتي ....وواحده لشخصيات جميله قابلتها سواء لسه اعرفها او بمقتش اشوفها ... التالته لشخصيه لسه مقابلتهاش واتمني تتوجد في حياتي ..

لو اعطيتك ورقه فيها 3 سطور تكتب الي انت عايزه تكتب ايه؟

علمتني الحياه ان اللقاء قدر والفراق قدر والحب قدر والالم قدر والموت قدر , واني لا يمكن ان اهرب من قدري ..ان لا اضحك كثيرا لان كل ابتسامه يعقبها وجع والم ...... وان ادخر دموعي فالحياه تحمل الكثير والكثير ........
ان قلوب الناس تتبدل كاوراق الشجر في موسم الخريف ..

ماهو هدفك في الحياه؟

الحقيقه والسراب

ان شاء الله بكره هيكون احسن من النهارده؟هل تصدق هذه العباره؟
في الاحلام بس !!!

اجمل مقوله سمعتها في حياتك ايه؟
لن تمتهن الا اذا تلهفت
لن تحتقر الا اذا توسلت
لن تموت الا اذا انبطحت ارضا وزحفت

من المغني الي بتحبه اوي واحلي اغنيه ليه ايه؟
بتشدني الكلمات بصرف النظر عن صاحبها

غزه تمثل ايه في حياتك؟
احد اوجاع امتنا التي لا تنتهي اوجاعها

اعطي لانتمائك لوطنك درجه بالمئه؟
ميه في الميه , فالوطن شريان الحياه في اجسادنا ومهما تألمنا منه لا يمكن تغييره

لو تزوجت وانجبت بنتين وولدين اسمهم هيكون ايه؟
منه وآيه ..مصطفي وعبد الرحمن

عمرك غشيت في امتحان وانت صغير؟
ههههههههه طبعا حصل اكدب يعني , لكن تأنيب ذاتي جعلني اكف عن ذلك تماما بس ممكن اغشش لاني بتحرج اقول لحد لأ

قول 3 صفات ب3 كلمات اوصف بيهم شخصيتي؟
عاقل جدا مجنون ,متقلب الحالات المزاجيه .. نهر من المشاعر الملتهبه في القطب الشمالي .. لست ملاكا ولا شيطان

لو مرتبك كان كتير يكفي اجيب اغلي هديه اجيب لكل فرد في عيلتك ايه؟
حاجه تمنحهم السعاده ولو مؤقتا لان السعاده الدايمه خرافه من عالم الحواديت

برده بكلمه واحده ايه الصفه الي عاوزها في شريك حياتي؟
محب لدرجة الجنون يحمل روح تنتمي لعالم الملائكه

ايه المجال الي غير دراستك وشايفه نفسي فيه اوي حتي لو كان الرسم علي الحيطه؟
اكتب واكتب واكتب

طب دلوقتي حالا ايه المكان الي نفسك تكون فيه ؟
في السماء !!!

يالنسبه للتاج الاول متهيالي معظم المدونات جاوبت عليها حتي احتمال يذيعوه علي الستلايت ممممم , لكن لو توتا صاحبة مدونة يوميات فتاه محتاره لسه مجاوبتش فبهديله ل

التاج التاني فبهديه للاسماء التاليه لو لسه مجاوبوش عليه نور حياتي ..مني.. اخر العنقود ..شهد الكلمات ..رانيا ..فارس بلا جواد ..روز..شيماء ومدونة احتمال.. سنووايت ..احلام اليقظه ..نورا ومدونة اه وكفي ..ساره ومدونة البراءه .. حبيبه...ابي....عمرو.. واي حد يحب يجاوب عليه